حضرت ام سلیم

نوم اونسب : نوم یې سهله یا رمله اوکنیت یې ام سلیم ، غمیصاء یا رمیصاء یې لقب ؤ ، دملحان بن خالد بن حرام بن جندب بن عامر بن غنم بن عدي بن نجار لور وه
دمورنوم یې ملیکه او دمالک بن عدي بن زید ابن منات لوروه

نکاح : دحضرت ام سلیم له مالک بن نضر سره نکاح شوي وه ،

اسلام : په مدینه منوره کې داسلام په اولنیو وختونوکې یې ایمان راوړی اوځان یې دحق دین دکاروان دلارویانو ملګری کړی ؤ ، دهغې دژوندملګری مالک بن نضر چونکه دخپل پلرني دین پیروان ؤ نویې له ام سلیم رضی الله عنها څخه هم دا آرزو درلوده چې دده په شان دخپل پلرني دین متابعت وکړي اوداسلام دین پریږدي ،
خوام سلیم رضی الله عنها داسلام په مبارک دین باندي ډیره ټینګه ولاړه وه له همدي وجهي ددوی دوو ترمنځ څه مشکلات پیداشول چې هغه دمالک دناراضه کیدلو سبب شول ، بالآخره مالک په همدي ناراضګي کې شام ته ولاړ اوهمهلته وفات شو
ابوطلحه کوم چې له همدي قبیلي څخه حضرت ام سلیم ته دنکاح پیغام ولیږل ، خوام سلیم بیاهم هغه عذر پېش کړ ، یعني ابوطلحه مشرک ؤ نوځکه ام سلیم نه غوښتل چې ورسره نکاح وکړ ي ، ابوطلحه څوورځي داسلام راوړلو فکر کول اوله څوورځو تېریدلو وروسته یې داسلام اعلان وکړ اوراغی دام سلیم په مخکې یې دشهادت کلمه وویله
ام سلیم رضی الله عنها خپل زوی حضرت انس ته وویل : چې اوس تاسو زمانکاح له ابوطلحه سره وکړئ او ورته ووایاست چې مهرمعاف دی ، ځکه چې زمامهر دهغه اسلام راوړل ؤ
حضرت انس رضی الله عنه وویل :چې داڅومره عجیب اونادر مهر دی

عام حالات : له نکاح وروسته ابوطلحه له نبي کریم صلی الله علیه وسلم سره په بیعت عقبه کې شرکت وکړ اوڅومیاشتي وروسته نبي کریم صلی الله علیه وسلم مدیني منوري ته تشریف راوړ ، په همدي وخت کې ام سلیم خپل زوی حضرت انس رسول الله صلی الله علیه وسلم ته حاضر کړ اوورته یې وویل : انس مي ستاسو دخدمت لپاره راوستلی اودغه زمازوی دی ته ده ته دعاوکړه
نبي کریم صلی الله علیه وسلم ورته دعاوکړه ،
په همدي زمانه کې نبي کریم صلی الله علیه وسلم دمهاجرو اوانصاروترمابین دورورګلوي تړون وکړ اوداغونډه یې دام سلیم رضی الله عنها پرکور جوړه کړه
حضرت ام سلیم رضی الله عنها په غزواتوکې په ډیرجوش سره برخه اخسته ، په صحیح مسلم کې حدیث دی ، کان رسول الله صلی الله علیه وسلم یغزو بام سلیم ونسوة من الانصار معه اذا غزا فیسقین الماء ویداوین الجرحی ،
ژباړه : رسول الله صلی الله علیه وسلم به ام سلیم اودانصارو یوڅوښځي له ځان سره غزاته بیولي ، هغوی به مجاهدینوته اوبه ورکولي اوزخمیانوته به یې مرهم پټۍ لګولي
په غزوه احدکې چې کله مسلمانانو دجنګ اقدام وکړ نو ام سلیم رضی الله تعالی عنها له ډیري لویي راستۍ څخه کارواخست
په صحیح بخاري کې له حضرت انس رضی الله عنه څخه منقول دي فرمایې : ماام سلیم اوحضرت عائشة رضی الله عنهما ولیدلي چې ژي به یې ډک ډک راوړل اوزخمیانوته به یې اوبه ورکولي ، کله به چې ژي خالي شول بیرته به ولاړي اوژي به یې ډک راوړل
دهجرت نبوي په اووم کال دخیبرپه غزاکې شریکه وه ، کله چې رسول الله صلی الله علیه وسلم له حضرت صفیة رضی الله عنهاسره نکاح وکړ ه نوحضرت ام سلیم درسول الله صلی الله علیه وسلم ته ناوې جوړه کړه ،
په غزوه حنین کې ام سلیم له ځان سره یوخنجر راوړی ؤ ابوطلحه چې خنجرولید رسول الله صلی الله علیه وسلم ته یې وویل : ام سلیم خنجر راوړی دی ، نبي کریم صلی الله علیه وسلم پوښتنه ورنه وکړه چې په خنجرڅه کول غواړي ؟ ام سلیم ورته وویل : که چیري یومشرک نږدي راشي نوپه همدي خنجر به یې نس ورڅیري کړم ، نبي کریم صلی الله علیه وسلم واوریدل او ویې خندل ،

اولاد یې : لکه څرنګه چې مخکي معلومه شوه حضرت ام سلیم دوې نکاحي کړي وي له اول خاوند یې حضرت انس بن مالک اوله دوهم خاوند یې ابوعمیر کوم چې په وړکتوب کې وفات شوی ؤ اویوبل زوی عبدالله زیږیدلي ؤ

فضل اوکمال

له حضرت ام سلیم رضی الله تعالی عنها څخه ګڼ حدیثونه هم روایت شوي ، حضرت انس ،عبدالله بن عباس ،زیدبن ثابت ،ابوسلمة اوعمروبن عاصم رضی الله تعالی عنهم اجمعین له هغې نه روایتونه کړي
له هغې څخه ګڼ شمیرکسانو دمسائلوپه اړه پوښتني کولي ، دحضرت ابن عباس اوزیدبن ثابت رضی الله عنهم ترمنځ په یوه مسئله کې اختلاف ؤ چې دحل کولو لپاره یې حضرت ام سلیم څخه پوښتنه وکړه اودواړو بزرګانودهغې حکم ومنل
دمسائلو په پوښتلو کې له حضرت ام سلیم سره هیڅ عار اوپیغور نه ؤ ، بلکه هرقسم مسائل یې له نبي کریم صلی الله علیه وسلم څخه پوښتل ، هغه یوه ورځ د نبي کریم صلی الله علیه وسلم په خدمت کې حاضره شوه اوورته یې وویل : یارسول الله ! الله تعالی له حقي خبري څخه شرم نه دی فرمایلی نوآیا پرښځوباندي په خوب کې غسل واجبیږي ؟ حضرت ام المؤمنین ام سلمة رضی الله تعالی عنها داخبره واوریده اورته په غصه شوه چې تادښځو ډیره رسوایي وکړه ، کله هم ښځي داسي کیدای شي؟ نبي کریم صلی الله علیه وسلم وفرمایل : ولي نه شي کیدی ؟ که چیري ښځي داسي نه وایې وبیاولي بچیان له مورسره هم شکله یعني دمورپه شکل کیږي

اخلاق یې : په حضرت ام سلیم رضی الله تعالی عنها کې ډیرلوی فضائل جمع ؤ ، دامیان جوش یې دومره زیات ؤ چې له خپل میړه څخه یې یواځي پردي خبره جلاوالی اختیارکړچې هغه ددي په اسلام قبلولو رضامندنه شو ، دابوطلحه پیغام یې محض پردي خبره ور رد کړ چې مشرک ؤ اوپرهمدي موقع یې ابوطلحه ته په داسي ښه انداز داسلام بلنه ورکړه چې هغه بلکل دمنلو وړو ؤ
په مسنداحمدکې راغلي دي : قالت یااباطلحة الست تعلم ان الهک الذي تنبت نبتا من الارض ؟ قال بلی ! قالت : افلاتستحیي تعبدشجرة ؟
ژباړه : ای ابوطلحة ! آیا ته نه پوهیږي چې ستارب هغه څوک دی چې له ځمکي څخه واښه اودرختي راشنه کوي ؟ اوبوطلحه ورته وویل : بلی ! ام سلیم ورته وویل : نوتاته شرم نه درځي چې ددرختي عبادت کوي ؟
په ابوطلحه دې تقریردومره اثر وکړ چې فورا مسلمان شو

له نبي کریم صلی الله علیه وسلم سره دهغې محبت : له نبي کریم صلی الله علیه وسلم سره یې دومره زیات محبت ؤ چې په نني عصرکې یې تصور هم نه شي کیدای ، رسول الله صلی الله علیه وسلم به اکثره وخت ددي کورته تشریف راوړ اوپه غرمه کې به یې آرام کاؤ ، چې کله به رسول الله صلی الله علیه وسلم له بستري څخه پورته شو نو ام سلیم به پرهغې باندي وکتل اوکوم ویښتان چې به له رسول الله صلی الله علیه وسلم څخه پربستره لویدلي ؤ هغه به یې راټولول اوپه ښېښه کې به یې سره جمع کول ،
یوه ورځ رسول الله صلی الله علیه وسلم ددې دژي له خولي څخه اوبه وڅښلي اوخوله مبارکه یې دهغې دژي پرخوله کښېښوده ، ام سلیم دهغه ژي خوله پري کړه اوله ځان سره یې وساتله اوویل به یې : چې له دي ځای څخه دنبي کریم صلی الله علیه وسلم مبارکه خوله لګیدلي ده زه غواړم چې داتبرک له ماسره پاتي شي ،

دنبي کریم صلی الله علیه وسلم هم له هغې سره خاص محبت ؤ ، په صحیح مسلم کې راغلي دي : کان النبي صلی الله علیه وسلم لایدخل علی احدمن النساء الاّ علی ازواجه الا ام سلیم فانه یدخل علیها