لیکوال: عادل خپلواک بـــــرخه: نوري مقالې


دسوچي نوم به داولمپيک له کوربه توب سره دډيرو تر غوږ شوی وي، سوچي چي اوس مهال داولمپيک دلوبو کوربه دی، خودخپلو مسلمانانو لپاره کوربه پاته نه شو، بلکه اوس مهال اسلامي نړۍ دسوچي دمسلمانانو لپاره کوربنه ده.


سوچي چي اوس مهال دروسيې یوښار بلل کيږي او له توري بحيرې سره په غاړه پروت دی دتاریخ هغه توره ورځ لیدلي، چي په اسلامي تاریخ کي يې ددې سیمي نقش او نوم تت کړ.


له ۱۸۶۴ کال څخه وړاندي دسوچي شنه زرغونه سیمه داسلامي عثماني خلافت ترواک لاندی وه او په دې ځای کي مسلمان شرکس قبائل اوسیدل،هلته مسلمانانو داسلامي خلافت تر چتر لاندي دارام ژوند کاوو، ددې ځای پرېمانه اوبو، چینو، سمسورو باغونو او ونو دمسلمانانو ژوند ته نوره ارامتیا وربښلې وه، چي له ۱۸۶۴ کال وړاندي دروسي تزار پوځ دسوچي په مسلمانانو چي داسلامي خلافت په پلوي يې جګړه کوله، ورسره جګړه پيل کړه، چي په ۱۸۶۴ کال کي دتزاري عيسايي پوځ له لوري ددې ځای مسلمانان قتل عام کړای شول او داسلامي خلافت واک له دې ځایه ختم کړای شو، مسلمانان په ډیر بې دردي سره شهيدان کړای شول، څنګه چي سوچي دتوري بحيرې سره نږدې پروت دی، نو ډیر مسلمانان په دغه سمندر کي غرق کړای شول اونور يې په تېښته د قفقاز دنورو شمالي سیمو دخلکو په ګډون ترکيې، اردن، فلسطین او سوريې ته وتښتېدل، دسوچي دمسلمانانو عام وژنه په ۱۸ پيړۍ کي ترټولو بوږنونکې بلل شوي.


سوچي دمسلمانانو کوربه توب پرېښود، خونړۍ په ځانګړې توګه يې اسلامي هیوادونو کوربه توب ومانو،اوس مهال دسوچی نږدې ۵ ميلیونه مسلمانان په ترکيه کي اوسیږي او په زرګونو يې په سوریه، اردون، فلسطین او داسي نوروهيوادونو کي ژوند کوي.


له اسلامي خلافت سره دکفري نړۍ ددوام داره جګړو او دمسلمانانو له سره دکفري نړۍ له لوري داسلامي خلافت دسيوري دلري کولوله امله مسلمانان په دې ونه توانېدل، چي خپل انتقام بيرته واخلي اویالږترلږه بيرته دسوچي په ګډون هغه سيمي او خاوري ونيسي، چي دمسلمانانو دښمنانو ورڅخه نیولي دي او دالله تعالی په ځمکه دالله تعالی قانون نافذ کړي.


دسوچي مسلمانانو ددوی په خپل پلرني ټاټوبي کي داولمپيک له لوبو سره خپل کلک مخالفت وښود او خپله دروسيې په ګډون دنړۍ په ډيرو هیوادونو کي يې ددې لوبوپه خلاف مظاهرې وکړې.


اوس چي د سوچي مظلومو مسلمانانو خپل غږ دمظاهرو له لوري اوچت کړ، چا يې غږ ته لبيک ونه وایو، داخو لاڅه بلکه غږ يې په ستوني کي ور غلی کړای شو او غوښتنو ته یې هيڅ انعکاس ورنه کړای شو، رسنیو یوازي خپل تمرکز دسوچي په اولمپيک لوبو راټول کړی وو، په دې وخت کي ازادو رسنیو خپل مسیر ډیر تنګ کړ، ولي يوازي یومحدود شمېر رسنیو دسوچي دمسلمانانو غږ تر نړۍ ورساوو، چي اوس مهال دنړۍ په نورو هیوادونو کي اوسیږي.


خوبرعکس که کله دتاریخ په اوږدو کي په یهودانو، عيسایانو او بودایانو کوم زیاتی شوي وي، رسنۍ يې ورسره په یوه غږ دهغې ورځي لمانځنه کوي او په هغوی دتيري او زیاتي کيسه دتاريخ یوه افسانه وګرځوي.


داڅه بلکه دبشري حقونو کوم سازمان هم دسوچي له مسلمانانو سره خپله همغږي ونه ښودله اونه هم دنړۍ کوم هیواد له دې امله په دې ژمنیو اولمپيک لوبو کي برخه وانخيستله، چي ددې سيمي په مسلمانانو تیر شوی او یاددې ځمکي اصلي مالکان(مسلمانان) په خپله ځمکه کي ددې لوبو اجازه نه ورکوي.


خو ترهغوبه څوک دمسلمانانو دمظلومیت غږ وانوري او نه به ترهغو مسلمانان خپل پخواني برم ته وروګرځي، چي ترڅو يې په خپل منځ کي اتفاق او اتحاد نوي راوستلی او ترهغه به يې په خپل منځ کي اتفاق رانشي، چي ترڅو يې په خپلو هڅو اسلامي خلافت قائم کړی نه وي.


دمسلمانانو دبریاپه هيله


عادل خپلواک